أسعار سيارات تويوتا والمراجعات والعروض في السعودية

بص يا سيدي، أنا من الناس اللي دورت كتير قبل ما أشتري عربية، وجربت كل حاجة من جيلي ستار راي لنيسان سنترا وفولكس فاجن جيتا، بس في الآخر رجعت للكلاسيكيات واخترت تويوتا كورولا 2021 1.2T Plus، لأنها ببساطة مفيهاش مشاكل، ودي أهم حاجة لواحد في التلاتينات زي عنده شغل وبيت ومسؤوليات. جبتها ومعاها شوية هدايا زي كشافات LED، حساسات ركن، تظليل، دواسات، و7 صيانات مجانية. العربية مش هتفاجئك ولا هتخطف قلبك، بس هتعيش معاك وتخدمك، مريحة، ناعمة، عفشتها متماسكة، وأداءها كفاية للمشاوير اليومية، مش لازم تطير. الداخلية بسيطة بس مريحة، والكونسول مفيهوش كار بلاي، بس مش نهاية العالم، بوصّلها بالواي فاي وخلاص. استهلاك البنزين حوالي 6.3 لتر لكل 100 كم، وأنا سواقتي هادية. باختصار، الكورولا مش أحسن عربية في كل حاجة، بس يمكن أكتر عربية "من غير وجع دماغ"، وده أهم من أي أرقام أو شاشات كبيرة.

جالي فرصة إني أجرب تويوتا كورولا الجديدة، النسخة الـ1.2T فئة إليت، بصراحة مافيش تغييرات كبيرة في الشكل عن الجيل اللي قبل كده، لكن قلت أشارك رأيي بكل بساطة. أداء الموتور مش قوي قوي، 116 حصان على عربية بالحجم ده يعتبر مقبول، لكن لما تدوس فعلاً وبتسحب في عدد لفات أعلى، بتحس إنها مش بطيئة خالص، بل بالعكس أخف من اللي كنت متوقعه. الفتيس CVT ناعم ومعقول، بس على السرعات البطيئة فيه شوية اهتزازات خفيفة وسحب خفيف لما تسيب البنزين. لما تطلب تسارع قوي، العربية بتاخد وقت شوية لحد ما توصل للـRPM المطلوب، بس مش مزعج. العفشة حلوة مع المطبات الكبيرة، لكن في المطبات الصغيرة أو الطرق غير المستوية بتحس شوية بتفاصيل الأرض، خصوصًا لو ماشي على سرعة بسيطة. في الملفات السريعة العربية بتتصرف كويس، وبتستجيب معاك بثبات، فده كان شيء مفاجئ بصراحة. الدركسيون ممتاز، خفيف على السرعات القليلة وبيشد شوية مع السرعة، التوجيه سهل وواضح. الفرامل كمان سهلة التعود وسلسة جدًا، مافيهاش مشاكل. العزل متوسط، الصوت الخارجي بيبدأ يبان بعد سرعة معينة، خصوصًا من الأرض، لكن صوت الموتور مش مزعج حتى على RPM عالي، وده حاجة تُحسب له. من جوه، التصميم زي ما هو تقريبًا، مافيش تغيير يذكر، والخامات مش أحسن حاجة، بلاستيك في كل مكان تقريبًا. الشاشة والعدادات ما اتطورتش في النسخة دي زي ما حصل في فئات الـ1.5 والهايبرد. حتى نظام التشغيل بطيء وشكله قديم، وملوش في التفاعل أوي، وده غريب في عربية 2024. المساحة قدام كويسة، وكرسي السواق بيتظبط على وضعية مريحة، لكن الكنبة ورا مش أحسن حاجة، المساحة متوسطة، والكرسي قصير شوية. الشنطة حلوة وتكفي الاستخدام العادي. فيه أنظمة أمان كويسة زي الرادار والمساعدة على القيادة، بس مافيش حساس ركن خلفي، حاجة غريبة جدًا بصراحة. بشكل عام، التجهيزات مش قليلة، لكن فيها أولويات مختلفة شويتين. في الآخر، العربية دي مافيهاش مفاجآت، وده يمكن يكون في صالح ناس كتير بتحب الحاجة المضمونة. هي مش عربية تسبق عصرها، بس للي بيدور على الاعتمادية وسهولة الاستخدام، ممكن تفضل اختيار منطقي، خصوصًا وسط زحمة السيارات الكهربائية والهجينة اللي بدأت تاخد السوق. المسألة كلها بترجع لاحتياجاتك والميزانية وقت الشراء.

صار لي تقريبًا شهر من استلام السيارة، وبصراحة حسّيت إنها أنسب للشباب، تصميمها رياضي والمساحة ما كانت صغيرة مثل ما توقعت، فقررت أطلبها بدون تردد. شكلها من أول نظرة عادي وما فيه شي مبالغ، وفعلاً السيارة أخفض من أغلب سيارات الـSUV الثانية. مشيت فيها لحد الآن تقريباً 600 كم، والاستهلاك حالياً بين 8.8 إلى 9 لتر لكل 100 كم، أغلب مشاويري داخل المدينة، فما جربت الخط كثير، وأتوقع الاستهلاك ينزل مع الاستخدام. التسارع ممتاز، خصوصًا إن الماكينة نفسها اللي على سيفيك، بس بصراحة ما أحب أضغط كثير، جربت مرة واحدة بس . الكاميرا الخلفية واضحة، وما ركبت 360 لأن متعود أستخدم المرايات، لكن أفكر أضيفها مستقبلاً، لأن دايم فيه نقاط عمياء. اللي جلسوا في الخلف قالوا إن المساحة جيدة، وما حسوا بضيق. أكثر شي ضايقني فعلاً هو نظام الترفيه، الكار بلاي فيه تأخير بسيط (1-2 ثانية)، وشفت ناس يقولون فيه نسخ بدون تأخير، ما أدري إذا هذا صحيح. وبرضه المساعد الصوتي يشتغل لحاله أحيانا، لما أكون أتكلم مع أحد فجأة يبدأ يرد علينا! الصوتيات (الهورن) تعبانة جداً، واحد من الشباب شبّهها بصوت سكوتر كهربائي، وأشوفه وصف دقيق . كمان مافيه زر واحد لرفع الزجاج تلقائياً وهذا غريب، وبصراحة العزل سيء، خاصة على السرعات، تحس بالهواء وصوت الكفرات، وتضطر تعلي الصوت عشان تتجاهل الضجة، يمكن هذا شيء طبيعي في كثير من السيارات اليابانية. مع كل هذا، كأول سيارة لي أنا راضي عنها، وتجربتي محدودة للآن فما أقدر أقارن كثير، لكن أتمنى تكون هالكلمات مفيدة لأي شخص يفكر يشتريها.

بصراحة أنا اشتريت الكورولا مش عن اقتناع كبير في الأول. كنت في ابريل اشتريت عربية مستعملة على السريع من سوق السيارات ، وطلعت مقلب على الآخر. كنت مستعجل عشان العيد، ومكانش عندي وقت لا أروح للميكانيكي ولا أتخانق، فمشيت بيها شوية وبعتها، وخلصنا. بعد كده حبيت اشتري حاجة جديدة مرة واحدة واقعد عليها 10 سنين من غير وجع دماغ. لقيت شكل السيفيك عجبنى والكورولا كمان. نزلت اشوف العربيتين، السيفيك فعلاً كانت جامدة، بس سعرها طلع عالي شوية فاستقريت على الكورولا. العربية في العموم ناعمة، وسواقتها مريحة، بس وأنا طالع مطلع أو واقف على إشارة في شارع طالع، بتحس إن العربية بتكسل تقوم، ولازم تدوس جامد، وساعتها صوت الموتور بيعلى أكتر ما العربية نفسها بتتحرك. الكراسي قدام كويسة، بس الكنبة ورا مش واسعة، وكنت متضايق جدًا لما اكتشفت إن الكنبة مبتتنيش، يعني لو عايز تشيل حاجة كبيرة مفيش حل. الاستهلاك الناس اللي بتقول 5 لتر مش فاهم بيجيبوا الأرقام دي منين، أنا فى المدينة مشيت على 6.8 لـ7.2، ورجلى مش تقيلة. من أول ما جبتها في 2 فبراير لحد أول أبريل كنت مشيت 4600 كم، ده لأني كنت بشتغل بيها شوية مشاوير بعد الشغل، وكمان خدت بيها طلعة طويلة رايح جاي على اسكندرية. أكتر حاجة لاحظتها إن العربية بتتأثر بالمطبات، مش مريحة أوي على الطرق اللي مش مظبوطة، بتحس بيها جامد. السواقة في الزحمة فيها أوقات العربية بتتهز شوية كده على سرعة 10 أو 15، مش دايمًا بس بتحصل. وفيه صوت تزييق خفيف بيطلع كأن زرار التكييف سايب سنة، بس ده بيظهر لما الطريق يكون مكسر. وكل ده ما يمنعش إن العربية ماشية في حالها، وأداءها ثابت، وسواقتها سهلة، وأنا بصراحة مرتاح معاها، خصوصًا بعد اللي حصل معايا في تجربة المستعمل. اللي ناوي يشتري كورولا، يشوف إمكانياته كويس، وهي تنفع جدًا للي عايز عربية تعيش، حتى لو فيها شوية تفاصيل مش كاملة.

أنا كنت بدوّر على عربية سيدان كويسة، ودخلت في دوشة الاختيارات زي أي حد: بصيت على السنترا والسيفيك، وكل واحدة فيها حاجة تعجب وحاجة تخليني أقول لأ. السنترا حسيتها هادية زيادة وأنا لسه شاب، والسيفيك كانت مغرية بس مش مقتنع بيها للنهاية. دخلت معرض تويوتا كده على السريع، أول ما دخلت لقيت الكورولا قدامي في المعرض، جربتها، والسيلز كانوا في منتهى الأدب والاحترام، عكس اللي قابلتهم في التوكيلات التانية، وفي الآخر اقتنعت وجبت الكورولا الهايبرد. بعد سنة استخدام، العربية بصراحة مريحة ونعمة، ومفيش مشاكل كبيرة، بس في نفس الوقت فيها شوية تفاصيل مزعجة زي الشاشة التعبانة البطيئة، والكاسيت شكله من العصر الحجري، فغيّرتهم. حتى الكراسي والدرج الوسطاني كانوا بيتوسخوا بسهولة، لبّستهم جلد. الأنوار كانت هالوجين، ركّبت LED، والكلاكس صوتُه ضعيق كده. من ناحية الأداء، كويسة، مش صاروخ بس كفاية للمشاوير. على سرعة 120+ كنت بحس العربية بتهفهف شوية، فغيّرت الجنط والكاوتش من 16 لـ 17 بوصة، وثبّتت العربية جامد على الطريق. أكتر حاجة مبهرة فعلاً كانت استهلاك البنزين، نزل معايا مرة لـ 3.9 لتر / 100 كم! بس بعد ما دوست على إعادة الضبط بالغلط، بقى يقرأ 5.3 ومش عارف أرجّعه تاني المساحة تمام، قدام مرتاح، وورا لشخصين كويس، 3 هيزحموا بعض. العيب اللي يضايقني فعلاً هو التكييف، خصوصًا ورا، مفيش فتحات فعالة، والهواء ضعيف شوية في الصيف. أنا بحب أظبط في العربية، فعدّلت كتير: فرامل، كاوتش، جنوط، أنوار، صوت، وشوية إكسسوارات خفيفة، بس في المجمل أنا راضي. نصيحتي للّي ناوي يشتري: ما تشتريش عشان الناس كلها بتشتري، اشتري عشان إنت مقتنع، وقارن أسعار ومميزات. وفي الآخر، الكورولا عربية محترمة، مش هتخذلك، بس مش مثالية... فيها شوية حاجات محتاجة تظبيط، ودي على حسب دماغك واستعدادك تصرف عليها شوية بعد الشرا.